Feria quarta
Gressus meos dírige secúndum elóquium tuum, et non dominétur mei omnis iniustítia.
Præsta, quǽsumus, Dómine, ut, per quadragesimálem observántiam erudíti et tuo verbo nutríti, sancta continéntia tibi simus toto corde devóti, et in oratióne tua semper efficiámur concórdes. Per Dóminum.
Súscipe, quǽsumus, Dómine, preces pópuli tui cum oblatiónibus hostiárum, et tua mystéria celebrantes ab ómnibus nos defénde perículis. Per Christum.
Præfatio de Quadragesima.
Notas mihi fecísti vias vitæ, adimplébis me lætítia cum vultu tuo, Dómine.
Sanctíficet nos, Dómine, qua pasti sumus, mensa cæléstis, et, a cunctis erróribus expiátos, supérnis promissiónibus reddat accéptos. Per Christum.
ad libitum adhibenda
Tibi plácitam, Deus noster, pópulo tuo tríbue voluntátem, quia tunc illi próspera cuncta præstábis cum tuis aptum féceris institútis. Per Christum.