Quando infra hebdomadam dicenda est Missa de feria, adhibentur textus infra propositi, nisi occurrat feria Adventus a die 17 ad diem 24 decembris.
Feria secunda
Audíte verbum Dómini, géntes, et annuntiáte illud in fínibus terræ: Ecce Salvátor noster advéniet, et iam nolíte timére.
Voci nostræ, quǽsumus, Dómine, aures tuæ pietátis accómmoda, et cordis nostri ténebras grátia Fílii tui nos visitántis illústra. Qui tecum.
Súscipe, quǽsumus, Dómine, múnera, quæ de tuis offérimus colláta benefíciis, et, quod nostræ devotióni concédis éffici temporáli, tuæ nobis fiat prǽmium redemptiónis ætérnæ. Per Christum.
Præfatio I de Adventu.
Veni, Dómine, visitáre nos in pace, ut lætémur coram te corde perfécto.
Prosint nobis, quǽsumus, Dómine, frequentáta mystéria, quibus nos, inter prætereúntia ambulántes, iam nunc instítuis amáre cæléstia et inhærére mansúris. Per Christum.