Dominica III Adventus
In hac Missa adhibetur coloris violaceus vel rosaceus.
Gaudéte in Dómino semper: íterum dico, gaudéte. Dóminus enim prope est.
Non dicitur Glória in excélsis.
Deus, qui cónspicis pópulum tuum nativitátis domínicæ festivitátem fidéliter exspectáre, præsta, quǽsumus, ut valeámus ad tantæ salútis gáudia perveníre, et ea votis sollémnibus álacri semper lætítia celebráre. Per Dóminum.
Dicitur Credo.
Devotiónis nostræ tibi, Dómine, quǽsumus, hóstia iúgiter immolétur, quæ et sacri péragat institúta mystérii et salutáre tuum nobis poténter operétur. Per Christum.
Præfatio I vel II de Adventu.
Dícite: Pusillánimes, confortámini et nolíte timére: ecce Deus noster véniet et salvábit nos.
Tuam, Dómine, cleméntiam implorámus, ut hæc divína subsídia, a vítiis expiátos, ad festa ventúra nos prǽparent. Per Christum.
Adhiberi potest formula benedictionis sollemnis.