Die 4 martii
Quarto Nonas mártii. Luna:
- Sancti Casimíri, fílii regis Polóniæ, qui, princeps, fídei zelo, castitáte et pæniténtia, benignitáte in páuperes atque devóta erga Eucharístiam et beátam Vírginem Maríam veneratióne enítuit et iúvenis, phthisi consúmptus, in óppido Grodna apud Vilnam in Lithuánia pie quiévit.
- Nicomedíæ in Bithýnia, sanctórum Phótii, Archelái, Quiríni et aliórum decem et septem, mártyrum.
- Tréviris in Rhenánia Austrásiæ, sancti Basíni, epíscopi, qui, e dúcibus Austrásiæ regni ortus, primum mónachus, dein abbas Sancti Maximíni Trevirénsis éxstitit et, ad sedem episcopálem civitátis demum evéctus, fundatióni sanctæ Irmínæ Epternáci consénsit.
- Comácli in Flamínia, sancti Appiáni, mónachi, qui, e monastério Papiénsi missus, hac in civitáte vitam exégit eremíticam.
- In monastério Cavénsi in Campánia, sancti Petri, qui, monásticam vitam a iuventúte secútus, Policastrénsis epíscopus eléctus est, sed, exterióris vitæ strépitum fastídiens, ad monastérium rédiit, ubi, abbas constitútus, disciplínam mire instaurávit.
- Cambérii in Sabáudia, beáti Humbérti, cómitis Sabáudiæ Tértii, qui, claustrum desérere coáctus ad rem públicam geréndam, monásticam vitam, ad quam mox vero rédiit, impénsius cóluit.
- Londínii in Anglia, beatórum Christóphori Bales, presbýteri, Alexándri Blake et Nicolái Horner, mártyrum, qui, persecutióne Elísabeth regínæ Primæ sæviénte, simul corónam glóriæ accepérunt.
- In cœnóbio Sancti Salvatóris Vicecómitis in Normánnia Gálliæ, beátæ Plácidæ (Euláliæ) Viel, vírginis, quæ in Congregatióne Scholárum Christianárum a Misericórdia regénda zelo et humilitáte cláruit.
- Vicétiæ in Itália, beáti Ioánnis Antónii Farina, epíscopi, qui, multiplíciter dedit óperam rei pastoráli et Institútum Sorórum Magistrárum a Sancta Dorothéa Filiárum a Sacris Córdibus fundávit, quæ de puellárum páuperum institutióne ac de ómnibus afflíctis discriminatísque providérent.
- In óppido Berezwecz apud civitátem Głębokie in Polónia, beatórum Miecislái Bohatkiewicz, Ladislái Maćkowiak et Stanislái Pyrtek, presbyterórum et mártyrum, qui, belli tempestáte, ob Christi fidem in cárcerem coniécti sunt et plumbis interfécti.