Sexto Idus mártii. Luna:

• Apamǽ ad Meándrum in Phrýgia, commemoratio sanctórum Caii et Alexándri, mártyrum, qui in persecutióne Marci Antoníni et Lúcii Veri imperatórum glorióso martýrio coronáti sunt.
• In Africa, commemorátio sancti Victóris, mártyris, in cuius festivitáte sanctus Augustínus ad pópulum de eo tractátum hábuit.
• Item commemorátio sancti Macárii, epíscopi Hierosolymitáni, cuius hortátu loca sancta a Constantíno Magno et sancta Hélena, eiúsdem matre, repurgáta sunt et sacris illustráta basílicis.
• Romæ apud sanctum Petrum, sancti Simplícii, papæ, qui, cum bárbari Itáliam et Urbem vastárent, afflíctos confirmávit, unitátem Ecclésiæ fovit et fidem firmávit.
• Parísiis in Gállia, sancti Droctovéi, abbátis, qui a sancto Germáno Augustodunénsi magístro suo monachórum cœnóbio hac in urbe institúto præpósitus est.
• In monastério Bobiénsi in Ligúria, sancti Attalæ, abbátis, qui, cœnobíticæ vitæ cultor, ad Lirinénse monastérium primum, mox ad Luxoviénse se cóntulit, ubi sancto Columbáno succéssit, zelo ac discretióne magnópere énitens.
• Glasguæ in Scótia, sancti Ioánnis Ogilvie, presbýteri et Societáte Iesu et mártyris, qui, post multos annos in stúdiis sacræ theológiæ peráctos exsul per regna Európæ, sacérdos ordinátus clam in pátriam rédiit, ubi summa cum sedulitáte omnem pastorálem hábuit curam concívium suórum, donec, sub Iacóbo rege Sexto in cárcerem coniéctus et morte damnátus, in patíbulo gloriósam palmam martýrii accépit.
• Parísiis in Gállia, beátæ Maríæ Eugéniæ Milleret de Brou, vírginis, fundatrícis Congregatiónis Sorórum de Assumptióne, ad puéllas christiáne educándas.
• Prope civitátem Cortázar in México, beáti Elíæ a Succúrsu (Matthǽi Elíæ) Nieves del Castillo, presbýteri ex Ordine Fratrum Sancti Augustíni et mártyris, qui, persecutióne furénte, comprehénsus quod ministérium clam adimpléret, in ódium sacerdótii plumbis cæsus est.