Die 6 ianuarii
Octávo Idus ianuárii. Luna:
- Sollémnitas Epiphaníæ Dómini, in qua triplex recólitur magni Dei et Dómini nostri Iesu Christi manifestátio: in Béthlehem, Iesus infans a magis est adorátus; in Iordáne a Ioánne baptizátus, a Spíritu Sancto unctus et a Deo Patre Fílius vocátus; in Cana Galilǽæ ad núptias aquam in vinum novum mutans glóriam suam manifestávit.
- Antínoe in Thebáide, sanctórum Iuliáni et Basilíssæ, mártyrum.
- Nannétibus in Británnia Minóre, sancti Felícis, epíscopi, qui próprii zeli testimónium concívibus desérviens perhíbuit, ecclésiam cathedrálem ædificávit necnon ruráles gentes continénter evangelizávit.
- Herbípoli in Francónia Germániæ, beáti Macárii, abbátis, qui primus monastério Scottórum in hac civitáte prǽfuit.
- Barcinóne in Cataláunia Hispániæ, sancti Raymúndi de Penyafort, cuius memória crástina die ágitur.
- Famagústæ in Cypro ínsula, tránsitus sancti Petri Thomæ, epíscopi Constantinopolitáni, ex Ordine Carmelitárum, qui Románi Pontíficis in Oriénte legáti missióne functus est.
- Fǽsulis in Etrúria, sancti Andréæ Corsini, epíscopi, ex Ordine Carmelitárum, qui, austeritáte et assídua sanctárum Scripturárum meditatióne insígnis, convéntus peste vastátos restítuit et Ecclésiam suam sapiénter rexit, paupéribus solácium áfferens et dissidéntes reconcílians.
- Valéntiæ in Hispánia, sancti Ioánnis de Ribera, epíscopi, vices quoque regis geréntis, qui, sanctíssimæ Eucharístiæ cultor et veritátis cathólicæ defénsor, pópulum diutúrnis institutiónibus erudívit.
- Romæ, sancti Cároli de Sétia, religiósi ex Ordine Fratrum Minórum, qui, inde a puerítia victum cotidiánum sibi comparáre coáctus, cómites ad imitatiónem Christi ac sanctórum inducébat et tandem, ut exoptábat, franciscáli veste indútus ante Sanctíssimum altáris Sacraméntum in adoratiónem se impéndit.
- Item Romæ, sanctæ Raphaélæ Maríæ a Sacro Corde Porras Ayllón, vírginis, quæ Congregatiónem Ancillárum Sacratíssimi Cordis Iesu instítuit, at mente capta iudicáta in tribulatiónibus et pæniténtia vitam sancte complévit.
- Marianópoli in província Quebecénsi Cánadæ, beáti Andréæ (Alaphrídi) Bessette, religiósi e Congregatióne a Sancta Cruce qui insígne sanctuárium in honórem sancti Ioseph ædificándum ibídem curávit.