Die 28 ianuarii
Quinto Kaléndas februárii. Luna:
- Memória sancti Thomæ de Aquíno, presbýteri ex Ordine Prædicatórum et Ecclésiæ doctóris, qui, summis intelléctus donis prǽditus, oratiónibus et scriptis exímiam sapiéntiam suam áliis trádidit. Ad Concílium Œcuménicum Lugdunénse Secúndum ab ipso beáto Gregório papa Décimo vocátus iter fáciens, in monastério Fossænóvæ in Látio die séptima mártii óbiit et multis post annis hac die corpus eius Tolósam translátum est.
- In monastério Reomǽnsi apud Língones in Néustria, sancti Ioánnis, presbýteri, viri Deo devóti, qui mónachos sub Régula sancti Macárii congregávit.
- Commemorátio sancti Iacóbi, eremítæ in Palæstína, qui pæniténtiæ causa diu in sepúlcro látuit.
- Conchæ Valériæ in Nova Castélla Hispániæ, sancti Iuliáni, epíscopi, qui, secúndus antístes post recuperátam a Mauris civitátem Ecclésiam illustrávit, in páuperes bona Ecclésiæ érogans et ópera mánuum victum cotidiánum sibi cómparans.
- Apud Sanctum Frediánum prope Pisas in Etrúria, beáti Bartholomǽi Aiutamicristo, religiósi ex Ordine Camaldulénsium.
- In vico Plévin in Británnia Minóre Gálliæ regióne, beáti Iuliáni Maunoir, presbýteri e Societáte Iesu, qui tam in pagis et vicis quam in úrbibus huius provínciæ quadragínta duos annos missiónibus totum se devóvit.
- In urbe Maokou provínciæ Guizhou in Sinis, sanctórum Agathæ Lin Zhao, vírginis, Hierónymi Lu Tingmei et Lauréntii Wang Bing, mártyrum, qui, catechístæ, sub imperatóre Wenzongxian ut christiáni deláti sunt et demum cápite truncáti.
- In urbe Daijiazhuang in província Shandong meridionáli Sinárum, sancti Ioséphi Freinademetz, presbýteri e Societáte a Verbo Divíno, qui ad opus evangelizatiónis in hac regióne indefésse adlaborávit.
- In civitáte Picassent in pago Valentíno Hispániæ, beátæ Maríæ Aloýsiæ Montesinos Orduña, vírginis et mártyris, quæ, persecutióne erga fidem sæviénte, per martýrium victóriæ Christi párticeps facta est.
- In campo detentiónis óppidi Kharsk prope Tomíscum in Sibiriána Rússiæ província, beátæ Olýmpiæ (Olgæ) Bidà, vírginis e Congregatióne Sorórum Sancti Ioseph et mártyris, quæ in regímine persecutiónis erga fidem pro Christi amóre ómnia tolerávit advérsa.