Liturgia Latina

Nono Kaléndas februárii. Luna:

• Memória sancti Francísci de Sales, epíscopi Genevénsis et doctóris Ecclésiæ, qui, verus pastor animárum, ad com muniónem cathólicam plúrimos fratres ab ea seiúnctos addúxit, devotiónem amorémque Dei scriptis christiános edócuit atque Ordinem Visitatiónis cum sancta Ioánna de Chantal instítuit; Lugdúni vero in humilitáte degens ánimam Deo réddidit die duodetrigésima decémbris et hac die Annécii depósitus est.
• Fulgínii in Umbria, sancti Feliciáni, qui primus epíscopus huius regiónis habétur.
• In pago Trecénsi in Gállia Lugdunénsi, sancti Sabiniáni, mártyris.
• Antiochíæ in Sýria, pássio sancti Bábylæ, epíscopi, qui, in persecutióne Décii imperatóris, postquam frequénter passiónibus suis ac cruciátibus glorificáverat Deum, gloriósum vitæ finem sortítus est in férreis vínculis, quibúscum corpus suum et sepelíri mandávit. Cum eo étiam passi referúntur púeri tres, scílicet Urbánus, Prilidánus et Epolónus, quos ille in Christi fide instrúxerat.
• Cínguli in Picéno Itáliæ, sancti Exsuperántii, epíscopi.
• Bináci prope Mediolánum in Langobárdia, beátæ Paulæ Gambara Costa, víduæ, quæ, Tértio Ordini Sancti Francísci adscrípta, violéntum cóniugem patiénter tolerávit et ad conversiónem duxit atque caritátem in páuperes semper insígniter exércuit.
• Londínii in Anglia, beatórum mártyrum Guliélmi Ireland, presbýteri e Societáte Iesu, et Ioánnis Grove, eius fámuli, qui, sub Cárolorege Secúndo proditiónis crímine falso insimuláti, Tybúrni pro Christo martýrium subiérunt.
• In vico Sainville in pago Gálliæ Carnuténsi, beátæ Maríæ Poussepin, vírginis, quæ ad pastóres animárum adiuvándos, ad puéllas erudiéndas necnon ad egénos ægrotósque iuvándos Institútum Sorórum Dominicárum a Caritáte a Præsentatióne Beátæ Maríæ Vírginis fundávit.
• In vico Pratulin in pago Siedlecénsi Polóniæ, beatórum Vincéntii Lewoniuk et duódecim sociórum,² mártyrum, qui, nec minis nec illécebris commóti, ab Ecclésia cathólica discédere noluérunt ac dénique parœ́ciæ suæ claves trádere respuéntes inérmes occísi sunt vel ad mortem vulneráti.
• Romæ, beáti Timóthei (Ioséphi) Giaccardo, presbýteri, qui in Pia Societáte a Sancto Paulo plúrimos instítuit discípulos ad mundo Evangélium nuntiándum, opportúnis adhíbitis communicatiónis sociális instruméntis.

² Quorum nomina: beati Daniel Karmasz, Lucas Bojko, Bartholomæus Osypiuk, Onuphrius Wasiluk, Philippus Kiryluk, Constantinus Bojko, Michael Nicephorus Hryciuk, Ignatius Franczuk, Ioannes Andrzejuk, Constantinus Łubaszuk, Maximus Hawryluk, Michael Wawrzyszuk.