Die 20 ianuarii
Tértio décimo Kaléndas februárii. Luna:
- Sancti Fabiáni, papæ et mártyris, qui láicus ad pontificátum divínitus est vocátus, et fídei ac virtútis gloriósum præbens exémplum, in persecutióne Décii imperatóris passus est; de eiúsdem agóne gratulátur sanctus Cypriánus quod in regénda Ecclésia irreprehensíbile illustréque testimónium perfecísset. Eius corpus Romæ via Appia in cœmetério Callísti hac die depósitum est.
- Sancti Sebastiáni, mártyris, qui, ex Medioláno oriúndus, ut refert sanctus Ambrósius, Romam proféctus est, quando persecutiónes acérbæ fervébant, ibíque passus est; ítaque in Urbe, quo hospes advénerat, domicílium immortalitátis perpétuæ obtínuit. Eius deposítio item Romæ ad Catacúmbas hac eádem die evénit.
- Apud Antínoen in Thebáide, sancti Asclæ, mártyris, qui coram prǽside minas non tímuit, cum maior ei formído Christum contémnere esset, et post vária torménta in flumen præcipitátus est.
- Nicǽæ in Bithýnia, sancti Neóphyti, mártyris.
- In Palæstína, sancti Euthýmii, abbátis, qui, natióne arménus et ab infántia Deo consecrátus, Hierosólymam pétiit et, plúrimis annis in solitúdine exáctis, ad extrémum vitæ usque firmus et álacer in humi litáte et caritáte, observántia disciplínæ clarus óbiit.
- Vigórniæ in Anglia, sancti Wulfstáni, epíscopi, qui, e claustro hanc ad sedem episcopálem evéctus, monásticos mores cum zelo pastoráli coniúnxit, summam impéndens curam in parœ́cias visitándas, in ecclesiárum erectiónem incitándam, in lítteras fovéndas, necnon in venalícia exprobránda.
- Coltibóni in Etrúria, beáti Benedícti Ricasoli, eremítæ e Congregatióne Vallis Umbrósæ.
- In Fínnia, sancti Henríci, epíscopi et mártyris, qui, in Anglia natus, Upsaliénsem Ecclésiam suscépit regéndam omni stúdio in Finnos evangelizándos incúmbens; crudéliter tandem ab homicída trucidátus est, quem iuxta ecclesiásticam disciplínam corrígere conátus erat.
- Messánæ in Sicília, sanctæ Eustóchii Calafato, vírginis, abbatíssæ ex Ordine Sanctæ Claræ, quæ ad prístinam vitæ reguláris disciplínam restaurándam et Christi sequélam e sancti Francísci more fovéndam omni stúdio se cóntulit.
- Seuli in Coréa, sancti Stéphani Min Kŭk-ka, mártyris, qui, catechísta, in cárcere pro fide christiána iugulátus est.
- Casáureæ prope Neápolim in Campánia Itáliæ, beátæ Maríæ Christínæ ab Immaculáta (Adalhéidis) Brando, vírginis, quæ vitam suam in puerórum christiánam institutiónem cóntulit et Congregatiónem Sorórum Victimárum Expiatrícum a Iesu Sacraménto fundávit, qua adoratiónem sanctæ Eucharístiæ valde suscitávit.
- In monastério Montis Sancti Bernárdi apud Licéstriam in Anglia, beáti Cypriáni (Michaélis) Iwene Tansi, presbýteri ex Ordine Cisterciénsi, qui, in território Onitsháno Nigériæ natus, adhuc puer, invíta família, christiánam fidem proféssus est et sacérdos ordinátus magna cum sedulitáte pastoráli curæ se cóntulit, donec mónachus efféctus sancta morte sanctam vitam consummáre méruit.