Die 18 ianuarii
Quinto décimo Kaléndas februárii. Luna:
- Carthágine, sanctórum mártyrum Succéssi, Pauli et Lúcii, episcopórum, qui Concílio in hac civitáte hábito interfuérunt et sub Décio imperatóre passi sunt.
- Nicǽæ in Bithýnia, sanctórum Coscónii, Zenónis et Melaníppi, mártyrum.
- Apud Fuxum in Gállia Narbonénsi, tránsitus sancti Volusiáni, epíscopi Turonénsis, qui, a Gothis captus, in exsílio Deo spíritum réddidit.
- Romæ, commemorátio sanctæ Priscæ, sub cuius nómine basílica in colle Aventíno Deo dedicáta est.
- In monastério Lutrénsi in Burgúndia, sancti Deícoli, abbátis, qui, natióne hibérnus et sancti Columbáni discípulus, cœnóbium illud condidísse fertur.
- Ferráriæ in Æmília, beátæ Beatrícis Esténsis, moniális, quæ, cóniuge defúncto et principátu sǽculi abdicáto, Deo in monastério ab ipsa sub Régula sancti Benedícti fundáto se dicávit.
- Apud Budam in Hungária, sanctæ Margarítæ, vírginis, quæ, fília Belæ regis Quarti, a paréntibus pro pátriæ liberatióne a Tártaris Deo vota et infans moniálibus Ordinis Prædicatórum trádita, adhuc duodénnis professióne religiósa ita Dómino totam se cóntulit, ut Christo crucifíxo ímpigre studúerit assimilári.
- Cremónæ in Langobárdia, beáti Fácii, qui, áurifex, ex pátria Veronénsi huc migrávit, pæniténtiæ, peregrinatiónibus et ægrotórum solámini magnópere déditus.
- Morbínii in Alpibus, beáti Andréæ de Piscária Grego, presbýteri ex Ordine Prædicatórum, qui pédibus totam regiónem diu peragrávit, parce vivens iuxta páuperes et ómnium ánimos fratérne sibi concílians.
- Aquilæ in Aprútio, beátæ Christínæ (Matthíæ) Ciccarelli, vírginis ex Ordine Sancti Augustíni.
- Braunsbérgæ in Borússia, beátæ Regínæ Protmann, vírginis, quæ, amóre páuperum capta, in egenórum servítium magnópere incúbuit et Congregatiónem Sorórum Sanctæ Catharínæ fundávit.
- Aprilíaci apud Andégavum in Gállia, beatárum Felicitátis Pricet, Mónicæ Pichery, Cárolæ Lucas et Victóriæ Gusteau, mártyrum, quæ, gállica perturbatióne sæviénte, in ódium christiánæ religiónis plumbis cæsæ sunt.
- Cássiæ in Itália, beátæ Maríæ Terésiæ (Maríæ Ioánnæ) Fasce, abbatíssæ monastérii Ordinis Sancti Augustíni, quæ ascésim ac contemplatiónem cum opéribus summópere coniúnxit erga peregrínos et indigéntes conficiéndis.