Die 13 ianuarii
Idibus ianuárii. Luna:
- Sancti Hilárii, epíscopi et Ecclésiæ doctóris, qui, ad sedem Pictaviénsem in Aquitánia evéctus, sub Constántio imperatóre ariánæ hǽresi addícto scriptis fidem nicǽnam de Trinitáte ac de Christi divinitáte strénue propugnávit, quaprópter quadriénnium in Phrýgiam relegátus est. Commentária quoque celebérrima in Psalmos necnon in Matthǽi Evangélium confécit.
- Singidúni in Mœ́sia, sanctórum Hermýlii et Stratoníci, mártyrum, qui post sæva torménta sub Licínio imperatóre in Istrum flumen demérsi sunt.
- Tréviris in Gállia Bélgica, sancti Agrícii, epíscopi, qui palátium a sancta Hélena dono datum in ecclésiam convértit.
- Remis item in Bélgica, deposítio sancti Remígii, epíscopi, qui, post Clodovéum regem sacro baptísmatis fonti et fídei sacraméntis initiátum, Francórum gentem ad Christum convértit et, annis ultra sexagínta in episcopátu exáctis, sanctitáte conspícuus e vita decéssit.
- Glasguæ in Scótia, sancti Kentigérni, epíscopi et abbátis, qui ibídem sedem suam constítuit et magnam monachórum congregatiónem secúndum formam primǽvæ Ecclésiæ instituísse narrátur.
- Capitolíadi in Batánea, sancti Petri, presbýteri et mártyris, qui, coram Walid Saracenórum príncipe accusátus quod fidem Christi per vias palam docéret, lingua manibúsque et pédibus amputátus et cruci affíxus martýrium, quod ardénter appetíerat, consummávit.
- Córdubæ in Vandalícia Hispániæ regióne, sanctórum mártyrum Gumesíndi, presbýteri, et Servidéi, mónachi, qui, cum ante Mauros príncipes iudicésque se christiános proféssi essent, ob Christi fidem occubuérunt.
- In monastério Ilbenstadénsi in Germánia, sancti Godefrídi, qui, comes Capenbergénsis, bonis invítis, ipsum castrum suum in monastérium mutári vóluit et, hábitu canonicáli assúmpto, egénis et infírmis strénuam navávit óperam.
- Prope Hóium in pago Leodiénsi, sanctæ Iuttæ, quæ, vídua, ad leprósos curándos se cóntulit, tandem prope eos reclúsa vitam degit.
- Medioláni in Langobárdia, beátæ Verónicæ de Binásco Negroni, vírginis, quæ monastérium Sanctæ Marthæ sub Régula sancti Augustíni ingréssa, ad altíssimam se cóntulit contemplatiónem.
- In urbe Nam Ðịnh in Tunquíno, sanctórum mártyrum Domínici Phạm Trọng (Án) Khảm, Lucæ (Cai) Thìn, eiúsdem fílii, et Ioséphi Phạm Trọng (Cai) Tả, qui sub imperatóre Tự Ðức, torménta mortémque subíre maluérunt quam crucem calcáre.
- Intra castra detentiónis Dacháni prope Monáchium Baváriæ in Germánia, beáti Æmílii Szramek, presbýteri et mártyris, qui, polónus natióne, in tempestáte belli hunc in campum inhumáne ob Christi fidem coram persecutóribus defénsam deportátus est et torméntis excruciátus occúbuit.