Die 1 ianuarii
Caléndis ianuárii. Luna:
- In octáva Nativitátis Dómini et die eius Circumcisiónis, sollémnitas sanctæ Dei Genetrícis Maríæ, quam Patres in Concílio Ephesíno Theotókon acclamavérunt, quia ex ea Verbum carnem assúmpsit et inter hómines habitávit Dei Fílius, princeps pacis, cui Nomen super omne nomen datum est.
- Cæsaréæ in Cappadócia, deposítio sancti Basilíi, epíscopi, cuius memória crástina die ágitur.
- In Campánia et Aprútio, commemorátio sancti Iustíni, qui epíscopus celebrátur, zelo et christifidélium defensióne clarus.
- Romæ, sancti Almáchii, qui, ludis gladiatórum obsístens, Alýpio præfécto Urbi iubénte, ab ipsis gladiatóribus occísus inter victóres mártyres adnumerátus est.
- Ad montem Iuram in pago Gálliæ Lugdunénsis, commemorátio sancti Eugéndi, abbátis Condatiscénsis, qui iam inde a puerítia in monastério degit, ubi vitam commúnem monachórum omni stúdio promóvit.
- Ruspis in Byzacéna, sancti Fulgéntii, epíscopi, qui, múnere procuratóris Byzacénæ functus, mónachus evásit; deínde epíscopus efféctus, témpore vandálicæ persecutiónis, ab ariánis multa perpéssus est et in Sardíniam a rege Thrasamúndo bis relegátus. Tandem pópulo suo restitútus, eum per réliquos vitæ annos veritátis et grátiæ verbo fidéliter nutrívit.
- Viénnæ in Burgúndia, sancti Clari, abbátis monastérii Sancti Marcélli, qui religiósæ perfectiónis exémplum mónachis trádidit.
- Trecis in Néustria, sancti Frodobérti, fundatóris et primi abbátis monastérii Cellénsis.
- In monastério Fiscamnénsi in Normánnia, tránsitus sancti Guliélmi, abbátis Sancti Benígni Divionénsis, qui novíssimis vitæ suæ tempóribus plúrimos mónachos in quadragínta monastériis distribútos fírmiter ac prudénter rexit.
- Apud Silviníacum in Burgúndia, tránsitus sancti Odilónis, abbátis Cluniacénsis, qui, sevérus in se, in áliis vero dulcis et miséricors, inter belligerántes indútias pro Deo instítuit et, témpore famis, omnímodo afflíctos levávit, dein primus commemoratiónem ómnium fidélium defunctórum postrídie festi Omnium Sanctórum in monastériis suis constítuit.
- Gablónæ in Bohémia, sanctæ Zdislávæ, matrisfamílias, quæ afflíctis magno solácio fuit.
- Gualdi Captaneórum in Umbria, beáti Hugolíni, qui vitam eremíticam duxit.
- Romæ, sancti Ioséphi Maríæ Tomasi, presbýteri ex Ordine Clericórum Regulárium vulgo Theatinórum et cardinális, qui, cultus divíni instauratiónem ardénter cúpiens, in perquiréndis edendísque antiquióribus sacræ Litúrgiæ téxtibus et monuméntis totíus fere vitæ tempus exégit atque púeris catechizándis óperam dedit.
- Aprilíaci apud Andégavum in Gállia, beatórum fratrum Ioánnis et Renáti Lego, presbyterórum et mártyrum, qui, gállica perturbatióne sæviénte, cum nefárium iusiurándum clero impósitum iuráre recusássent, decolláti sunt.
- Romæ, sancti Vincéntii Maríæ Strambi, epíscopi Maceraténsis et Tolentíni, e Congregatióne Passiónis, qui commíssas ipsi diœcéses sancte rexit et ob fidelitátem erga Románum Pontíficem servátam exsílium perpéssus est.
- Hasseléti prope Traiéctum Mosæ in Bélgio, beáti Valentíni Paquay, presbýteri ex Ordine Fratrum Minórum, qui in præcatióne, ministério reconciliatiónis et mariális corónæ devotióne mirum christiánæ caritátis prǽbuit exémplum, in spíritu humilitátis e mínimis áttingens summa.
- Leópoli in Ucraína, beáti Sigismúndi Gorazdowski, presbýteri, qui, polónus natióne, pietáte erga próximum exímius et óperum ad vitam tuéndam præcúrsor, Institútum Sorórum Sancti Ioseph fundávit, omnímodis in bonum páuperum et derelictórum incúmbens.
- Intra castra detentiónis Dacháni prope Monáchium Baváriæ in Germánia, beáti Mariáni Konopiński, presbýteri et mártyris, qui, polónus natióne, atrocitátes a médicis crudéliter irrogátas perpéssus pro Christo Dómino occúbuit.