Die 28 februarii
Prídie Kaléndas mártii; vel in anno bissextíli: Tértio Kaléndas mártii. Luna:
- Commemorátio sanctórum presbyterórum, diaconórum et aliórum plurimórum, qui Alexandríæ, témpore Galliéni imperatóris, cum pestis sævíssima grassarétur, morbo laborántibus ministrántes libentíssime mortem oppetiérunt; quos religiósa piórum fides mártyres venerári consuévit.
- Ad montem Iuram in território Lugdunénsi, deposítio sancti Románi, abbátis, qui, antiquórum monachórum exémpla sequens, primus illic vitam duxit eremíticam et póstea plurimórum pater éxstitit monachórum.
- Commemorátio sanctárum Maránæ et Cyræ, vírginum, quæ apud Berœam in Sýria in loco exíguo et consǽpto sub dio vitam duxérunt, ne tugúrium quidem habéntes, siléntium observántes et victum necessárium per fenestéllam accipiéntes.
Anno bissextili prætermittantur:
- Romæ via Tiburtína, deposítio sancti Hilárii, papæ, qui epístulas de fide cathólica scripsit, quibus Concília Nicǽnum, Ephesínum et Chalcedonénse confirmávit, primátum illústrans Románæ sedis.
- Vigórniæ in Anglia, sancti Oswáldi, epíscopi, qui, primum canónicus, dein mónachus efféctus, Eboracénsi demum ac simul Vigorniénsi Ecclésiæ prǽfuit atque Régulam sancti Benedícti multis in monastériis instítuit, comis, lætus ac doctus magíster.
- Aquilæ in Aprútio, beátæ Antóniæ de Floréntia, víduæ, póstea fundatrícis et primæ abbatíssæ monastérii Córporis Christi sub prima sanctæ Claræ Régula.
- In urbe Xilinxian in Sinárum Guangxi província, sancti Augústi Chapdelaine, presbýteri e Societáte Parisiénsi Missiónum ad éxteras gentes et mártyris, qui, a milítibus plúribus cum neóphytis apprehénsus quod christiánam fidem in hac regióne primus seminavísset, trecéntis verbéribus cæsus et in cávea exígua constríctus, tandem cápite obtruncátus occúbuit.
Quolibet anno:
- Apud Parísios in Gállia, beäti Daniélis Brottier, presbýteri e Congregatióne Sancti Spíritus, qui in opus pro órphanis condéndum se impéndit.
- In campo exítii Oświęcim seu Auschwitz prope Cracóviam in Polónia, beáti Timóthei Trojanowski, presbýteri ex Ordine Fratrum Minórum Conventuálium et mártyris, qui, pátria império in hómines ac religiónem hostíli subiécta, propter christiánam confessiónem supplíciis fractus martýrium consummávit.