Liturgia Latina

Quarto Kaléndas mártii; vel in anno bissextíli: Quinto Kaléndas mártii. Luna:

• Commemorátio sancti Alexándri, epíscopi, qui, senex gloriósus ac fídei zelo succénsus, post sanctum Petrum alexandrínæ Ecclésiæ factus antístes, Aríum presbýterum suum hærética impietáte depravátum et divína veritáte infirmátum de communióne Ecclésiæ eiécit, quem mox inter trecéntos decem et octo Patres annumerátus in Concílio Nicǽno Primo damnávit.
• Bonóniæ in Æmília, sancti Faustiniáni, epíscopi, qui Ecclésiam persecutióne vexátam verbo prædicatiónis firmávit et auxit.
• Gazæ in Palæstína, sancti Porphýrii, epíscopi, qui, Thessalonícæ natus, anachoréta quinque annos degit in Scetim ac tótidem trans Iordánem, benignitáte in páuperes conspícuus; póstea epíscopus Gazénsis ordinátus, multa evértit templa idolórum, quorum sectatórum moléstiis diu afféctus est, donec in pace cum sanctis venerábilis quiévit.
• Nivérni in Néustria, sancti Agrícolæ, epíscopi.
• Archíaci in Campánia Gálliæ, sancti Victóris, eremítæ, cuius laudes sanctus Bernárdus conscrípsit.
• Floréntiæ in Etrúria, sancti Andréæ, epíscopi.
• Londínii in Anglia, beáti Robérti Drury, presbýteri et mártyris, qui, coniuratiónis contra Iacóbum regem Primum falso insimulátus, Tybúrni, hábitu ecclesiástico indútus ad sacerdotálem dignitátem probándam, patíbuli supplícium pro Christo passus est.
• Olésæ Montis Serráti in pago Barcinonénsi Hispániæ, sanctæ Paulæ a Sancto Iosépho de Calasanz Montal Fornés, vírginis, quæ Institútum Filiárum Maríæ Scholárum Piárum fundávit.
• Alcantaríola prope Múrtiam in Hispánia, beátæ Pietátis a Cruce (Thomasínæ) Ortiz Real, vírginis, quæ pro amóre Dei ad institutiónem et catechésim páuperum sédulo inténdit et Congregatiónem Sorórum Salesianárum a Sacro Corde Iesu fundávit.