Die 19 februarii
Undécimo Kaléndas mártii. Luna:
- Neápoli in Campánia, deposítio sancti Quodvultdéus, epíscopi Carthaginénsis, qui una cum clero a Genseríco rege ariáno in exsílium eiéctus et obsolétis in návibus sine velis nec remígiis impósitus, præter spem Neápolim áppulit ibíque conféssor fídei occúbuit.
- Commemorátio sanctórum monachórum et aliórum mártyrum, qui in Palæstína a Saracénis, Alamundúro duce, ob Christi fidem sævíssime cæsi sunt.
- Medioláni in Langobárdia, sancti Mansuéti, epíscopi, qui advér sus monothelitárum hǽresim strénue pugnávit.
- Apud Benevéntum in Campánia, sancti Barbáti, epíscopi, qui Langobárdos eorúmque ducem ad Christum convertísse fertur.
- In monastério Vabrénsi in pago Ruthenénsi Aquitániæ, sancti Geórgii, mónachi.
- Bisiniáni prope Conséntiam in Calábria, sancti Procli, mónachi, qui, exímia prǽditus doctrína, aráldus fuit monásticæ conversatiónis.
- Cámeræ iuxta Bruxéllas in Brabántia, deposítio beáti Bonifátii, quondam epíscopi Lausannénsis, qui apud moniáles Cisterciénses loci ascéticam vitam exégit.
- Neti in Sicília, beáti Conrádi de Placéntia Confalonieri, eremítæ e Tértio Ordine Sancti Francísci, qui, sæculáribus ludis abiéctis, aspérrimum vitæ genus quadragínta prope annos in assídua oratióne et pæniténtia prosecútus est.
- Córdubæ in Vandalícia Hispániæ regióne, commemorátio beáti Alvári, presbýteri ex Ordine Prædicatórum, prædicatióne et Passiónis domínicæ contemplatióne conspícui.
- Mántuæ in Langobárdia, beátæ Elísabeth Picenardi, vírginis, quæ sub hábitu Ordinis Servórum Maríæ in patérna domo vitam Deo sacrátam egit, ad sacram communiónem assídue accédens atque in Litúrgiam Horárum Scripturarúmque meditatiónem eníxe incúm bens, Vírgini Maríæ devotíssima.
- In loco Kaiyang apud Mianyang in Sinárum Sichuan província, sanctæ Lúciæ Yi Zhenmei, vírginis et mártyris, quæ ob cathólicæ fídei confessiónem ad decollatiónem damnáta est.
- Intra castra detentiónis Dacháni prope Monáchium Baváriæ in Germánia, beáti Ioséphi Zapłata, religiósi e Congregatióne Sacratíssimi Cordis Iesu et mártyris, qui, e Polónia pátria vi in atrócem propter fidem datus custódiam, morbo corréptus martýrium consummávit.