Die 15 februarii
Quinto décimo Kaléndas mártii. Luna:
- Commemorátio beáti Onésimi, quem sanctus Paulus Apóstolus servum fugitívum excépit et in vínculis útpote Christi in fide fílium génuit, sicut ipse dómino eius Philémoni scripsit.
- Bríxiæ in Venétia, sanctórum Faustíni et Iovítæ, mártyrum, qui, post multa certámina ob Christi fidem suscépta, victrícem martýrii corónam accepérunt.
- Antiochíæ in Sýria, sanctórum mártyrum Isici, presbýteri, Iosíppi diáconi Románi, Zósimi, Baráli et Agápis, vírginis.
- Arvérnæ in Aquitánia, sanctæ Geórgiæ, vírginis.
- Vasióne in Gállia Lugdunénsi, sancti Quinídii, epíscopi.
- In valle Interocrína provínciæ Valériæ in Itália, sancti Sevéri, presbýteri, cuius sanctus Gregórius papa Magnus memóriam tenet.
- Cápuæ in Campánia, sancti Decorósi, epíscopi.
- Palatíoli in Etrúria, sancti Walfrídi, abbátis, qui, líberis génitis quinque, cum cóniuge státuit vitam monásticam dúcere.
- Véxsiæ in Suécia, sancti Sigfrídi, epíscopi, qui, ex Anglia oriún dus, gentes huius regiónis summa cum sedulitáte evangelizávit et regem ipsum Olavum in Christo baptizávit.
- Burgi Sancti Sepúlcri in Umbria, beáti Angeli Scarpetti, presbýteri ex Ordine Eremitárum Sancti Augustíni.
- Parédii Monachórum in Burgúndia Gálliæ, sancti Cláudii La Colombière, presbýteri e Societáte Iesu, qui, vir oratióni magnópere déditus, multos ad dilectiónem Dei firmo rectóque consílio suo diréxit.