Liturgia Latina

Quarto Idus februárii. Luna:

• Memória depositiónis sanctæ Scholásticæ, vírginis, quæ, soror sancti Benedícti, ab infántia Deo dicáta, unam cum fratre mentem in Deo hábuit, ita ut semel in anno apud Montem Casínum in Campánia totum diem in Dei láudibus sacrísque collóquiis dúcerent.
• Magnésiæ in província Asiæ, sanctórum Chalarámpi, Porphýrii, Daucti et trium mulíerum, mártyrum sub Septímio Sevéro imperatóre.
• In iugis montis Sina, sancti Móysis, qui primum in erémo vitam solitáriam duxit, deínde, Máuvia Saracenórum regína peténte epíscopus ordinátus, gentes ferocíssimas in pace compósuit et vitam christianórum illǽsam custodívit.
• Romæ via Labicána miliário décimo ab Urbe, sanctórum Zótici et Amántii, mártyrum.
• Iuxta Tarracínam in Campánia, sancti Silváni, epíscopi.
• Apud Sántonas in Aquitánia, sancti Troiáni, epíscopi.
• Vesontióne in Burgúndia, sancti Prothádii, epíscopi.
• In pago Rothomagénsi Néustriæ, sanctæ Austrebértæ, vírginis et abbatíssæ, quæ monastério Pauliacénsi nuper a sancto Audœ́no epíscopo fundáto pie prǽfuit.
• In spelúnca Stábulo Rhodis apud Rosétum in Etrúria, sancti Guliélmi, eremítæ Malavallénsis, e cuius exémplo plures oríginem duxérunt eremitárum congregatiónes.
• In monastério Præmonstraténsi Fossárum apud Namúrcum in Lotharíngia, beáti Hugónis, abbátis, cui magíster sanctus Norbértus, epíscopus Magdeburgénsis factus, novi Ordinis institutiónem concrédidit, quem trigínta quinque annos sapientíssime rexit.
• Arímini in Flamínia, beátæ Claræ, víduæ, quæ vitam ántea lascívam pæniténtia, carnis maceratióne ac ieiúniis expiávit et, sócias in monastério coadúnans, Dómino in humilitátis spíritu deservívit.
• Aprilíaci apud Andégavum in Gállia, beatórum Petri Fremond et quinque sociárum,³ mártyrum, qui in gállica perturbatióne propter fidelitátem Ecclésiæ cathólicæ servátam plumbis interfécti sunt.
• Valle Víridi de Itínere prope Onobam in Bǽtica regióne Hispániæ, beátæ Eusébiæ Palomino Yenes, vírginis ex Institúto Filiárum Maríæ Auxiliatrícis, quæ, humilitátis egrégium præbens exémplum, nulla pétita ostentatióne, spíritu abnegatiónis in imis munéribus suis cúlmina grátiæ accépit.
• In óppido Krašić prope Zagábriam in Croátia, beáti Aloýsii Stepinac, epíscopi Zagrebiénsis, qui doctrínis tam fidem quam humánam dignitátem denegántibus audácter óbstitit, donec, propter fidelitátem erga Ecclésiam diu in vínculis cónditus, morbo corréptus atque inédia consúmptus, egrégium consummávit episcopátum.

Quarum nomina: beatæ Catharina et Maria Ludovica du Verdier de la Sorinière, sorores; Ludovica Bessay de la Voûte; Maria Anna Hacher du Bois; Ludovica Poirier, uxor.