Prot. n. 276/24

Hæc Missa adhiberi potest, cum colore proprio diei vel Temporis, ubi peculiares celebrationes habentur occasione Anni Sancti, exceptis sollemnitatibus,dominicis et festis, diebus Hebdomadæ sanctæ, Tridui sacri, infra octavam Paschæ, feriis Adventus a die 17 ad 24 decembris inclusive, diebus infra octavam Nativitatis, Commemoratione omnium Fidelium Defunctorum et feria IV Cinerum.

Exspécta Dóminum, viríliter age; et confortétur cor tuum, et sústine Dóminum. (T.P. allelúia).

Omnípotens sempitérne Deus, fervens humáni cordis desidérium, réspice benígnus pópulum tuum per hoc grátiæ tempus peregrinántem, ut, Christo refúgio salútis suæ coniúnctus, ad beátæ spei finem felíciter adveníre possit. Per Dóminum.

Oblatiónes famíliæ tuæ, quǽsumus, Dómine, súscipe miserátus, ut, sub tuæ protectiónis auxílio, et colláta non perdat, et ad ætérna dona pervéniat. Per Christum.

℣. Dóminus vobíscum. ℟. Et cum spíritu tuo. ℣. Sursum corda. ℟. Habémus ad Dóminum. ℣. Grátias agámus Dómino Deo nostro. ℟. Dignum et iustum est.

Vere dignum et iustum est, æquum et salutáre, nos tibi semper et ubíque grátias ágere: Dómine, sancte Pater, omnípotens ætérne Deus:

Hoc témpore grátiæ, fílios tuos in unam famíliam cóngregas, ut, vitæ Verbo illustráti, mystérium Fílii tui crucifíxi et resurgéntis summo gáudio célebrent.

Ipse, salus semper imploráta sempérque exspectáta, omnes ad mensam suam vocat, córporis ac spíritus vúlnera sanat, contristátis lætítiam donat.

Propter hæc ómnia benevoléntiæ tuæ signa, viva fide ad certiórem spem renáscimur et nosmetípsos frátribus offérimus efficáci dilectióne, Dóminum, donec véniat, præstolántes.

Per quem, cum Angelis et ómnibus Sanctis, hymnum laudis tibi cánimus, sine fine dicéntes:

Sanctus, Sanctus, Sanctus Dóminus Deus Sábaoth…

Spíritus Dómini super me; evangelizáre paupéribus misit me, et prædicáre annum Dómini accéptum. (T.P. allelúia).

Deus, qui nos uno pane réficis et única spe susténtas, tua nos páriter grátia corróbora, ut, facti unum in Christo corpus et unus spiritus, ad glóriam cum ipso resurgámus. Qui vivit.

Benedícat vobis Dóminus, et custódiat vos. ℟. Amen.

Illúminet fáciem suam super vos, et misereátur vestri. ℟. Amen.

Convértat vultum suum ad vos, et donet vobis suam pacem. ℟. Amen.

Et benedíctio Dei omnipoténtis, Patris, et Filii, ✠ et Spíritus Sancti, descéndat super vos et máneat semper. ℟. Amen.

Dómine, refúgium factus es nobis a generatióne et progénie; a sǽculo, et in sǽculum tu es. (T.P. allelúia).

Deus, qui in plenitúdine témporum Fílium tuum in mundum misísti Salvatórem, concéde, quǽsumus, ut in hoc sǽculo peregrinántes lux paschális eius mystérii ad te, únicam spem nostram, ducat. Per Dóminum.

Quæ tuis altáribus exhibémus, Dómine, hunc annum sanctum lætánter celebrántes, sint tibi múnera accépta, ut ipsíus æternitátis mereámur esse consórtes, qui mortalitátem nostram sua mortalitáte curávit, Iesus Christus, Dóminus noster. Qui vivit.

℣. Dóminus vobíscum. ℟. Et cum spíritu tuo. ℣. Sursum corda. ℟. Habémus ad Dóminum. ℣. Grátias agámus Dómino Deo nostro. ℟. Dignum et iustum est.

Vere dignum et iustum est, æquum et salutáre, nos tibi semper et ubíque grátias ágere: Dómine, sancte Pater, omnípotens ætérne Deus: per Christum Dóminum nostrum.

Qui Fílius tuus, ante sǽcula génitus, natus est in témpore de María Vírgine, et a Spíritu Sancto unctus, in nómine tuo annum grátia prædicávit: consolatiónem míseris, captívis redemptiónem, toti dénique humáno géneri salútem et pacem.

Ipse enim única est spes vera quæ ómnium excédens exspectatiónem, univérsa sǽcula irrádiat.

Et ídeo, cum Angelis et Sanctis univérsis, te collaudámus, sine fine dicéntes:

Sanctus, Sanctus, Sanctus Dóminus Deus Sábaoth…

Iuste et pie vivámus in hoc sǽculo, exspectántes beátam spem et advéntum glóriæ magni Dei. (T.P. allelúia).

Sanctíficet nos, quǽsumus, Dómine, mensa tua participátio, et præsta, ut, quam Unigénitus tuus in cruce operátus est salútem, omnes gentes per Ecclésiæ tuæ sacraméntum gratánter accípiant. Per Christum.

Adésto, Dómine, supplícibus tuis et spem suam in tua misericórdia collocántes tuére propítius, ut in sancta conversatióne tibi fidéles permáneant, et, consequéntes sufficiéntiam temporálem, promissiónis tuæ perficiántur herédes in ætérnum. Per Christum Dóminum nostrum. ℟. Amen.

Et benedíctio Dei omnipoténtis, Patris, et Filii, ✠ et Spíritus Sancti, descéndat super vos et máneat semper. ℟. Amen.

Deus salvos nos fecit per lavácrum regeneratiónis et renovatiónis Spíritus Sancti, iustificáti grátia ipsíus herédes simus secúndum spem vitæ ætérnæ. (T.P. allelúia).

Deus, qui humáno géneri per Fílium Unigénitum et salútis remédium et vitæ ætérnæ donum contulísti, concéde ómnibus in ipso renátis et velle quæ prǽcipis et posse, ut pópulus ad regnum tuum vocátus sit in fide stábilis, spe gaudens, et in caritáte éfficax. Per Dóminum.

Réspice, Dómine, in fáciem Christi tui, única spes nostra, qui pro ómnibus redemptiónem trádidit semetípsum, ut per eum ab ortu solis usque ad occásum nomen tuum magnificétur in géntibus, et una ubíque maiestáti tuæ exhibeátur oblátio. Per Christum.

℣. Dóminus vobíscum. ℟. Et cum spíritu tuo. ℣. Sursum corda. ℟. Habémus ad Dóminum. ℣. Grátias agámus Dómino Deo nostro. ℟. Dignum et iustum est.

Vere dignum et iustum est, æquum et salutáre, nos tibi semper et ubíque grátias ágere: Dómine, sancte Pater, omnípotens ætérne Deus: per Christum Dóminum nostrum.

In ipso enim promissiónes tuæ véteres adimpléntur, umbra cedit lúmini, mundus iam renovátur, et homo nova fit creatúra.

Per oblatiónem sui semel in cruce factam, fílios tuos, qui erant dispérsi, vóluit in unum congregáre; et exaltátus in glória, primogénitus in multis frátribus, spem ætérni gáudii nobis pandit.

Unde et nos, Dómine, cum Angelis et Sanctis univérsis, tibi confitémur, in exsultatióne dicéntes:

Sanctus, Sanctus, Sanctus Dóminus Deus Sábaoth…

Ecce ego vobíscum sum ómnibus diébus, dicit Dóminus, usque ad consummatiónem sǽculi. (T.P. allelúia).

Cælésti pane roboráti, quǽsumus, Dómine, ut, Evangélio vitæ iúgiter adhæréndo, ferméntum vivíficans et salútis instruméntum humáno efficiámur consórtio. Per Christum.

Pax Dei, quæ exsúperat omnem sensum, custódiat corda vestra et intellegéntias vestras in sciéntia et caritáte Dei, et Fílii sui, Dómini nostri Iesu Christi. ℟. Amen.

Et benedíctio Dei omnipoténtis, Patris, et Filii, ✠ et Spíritus Sancti, descéndat super vos et máneat semper. ℟. Amen.

Tempore vero Adventus, Nativitatis, Quadragesimæ et Paschæ, pro liturgia Verbi lectiones de feria adhibeantur.

Is 61, 1-3a. 6a. 8b: Unixit me Dominus et evangelizare pauperibus misit me, et dare eis oleum gaudii. Spiritus Domini super me… 3 usque ad ad spiritu mæroris. 6 usque ad dicetur vobis. 8 Dabo upus eorum…

vel:

Rom 5, 5-11: Caritas Dei diffusa est in cordibus nostris. Fratres: Spes non confundit…

Ps. resp. Ps 89 (88), 21-22. 25 et 27 ℟ (cf. 2a): Misericordias tuas, Domine, in æternum cantabo.

Is 61, 1 (cf. Lc 4, 18): Spiritus Domini super me; evangelizare pauperibus misit me.

Lc 4, 16-21: Misit me praedicare annum Domini acceptum. In illo tempore: Venit Iesus Nazareth…