Liturgia Latina

De Communi virginum vel de Communi sanctarum: pro religiosis.

Misericors Deus, cuius Filio pro nobis puero nato beata Clara virgo in fovendis infantibus praesertim pauperibus ac derelictis servire studuit, praesta, quaesumus, ipsa intercedente, ut Ecclesiae tuae numquam deficiant, qui ad puertitiam tuendam viasque salutis docendam nitantur. Per Dominum.

Lectio I: Sir 51, 13-10: «Danti mihi sapientiam dabo gloriam».
Cum adhuc iunior essem…

Ps. Resp.: Ps 119 (118), 1-8.
℟ (cf. 1): Beati qui ambulant in lege Domini.

Alleluia: Io 15, 9b. 5b: Manete in dilectione mea. Qui manet in me, et ego in eo, hic fert fructum multum.

Evang.: Mc 9, 34-37: «Quisquis unum ex pueris recipit, me recipit».
In illo tempore discipuli Iesu inter se in via…

Beata Clara Fey nata est die 11 aprilis anno 1815 Aquisgrani. Suis iam iuvenilibus annis, tempore sic dictae primae industrializationis, sensit obligationem, ut pueritiae iuventutique, quam in civitate sua saepe experta est neglectam et derelictam, adiuvandae fovendae instituendae propriam vitam impenderet. Pariter sibi innotuit se esse vocatam ad vitam religiosam. Anno 1844 Congregationem Sororum a Paupere Infante Iesu fundavit, quam Archiepiscopus Coloniensis approbatione ecclesiastica munivit. Tempore quod Kulturkampf vocatur Congregatio coacta est sedem generalitiam in Nederlandiam transferre. Pluries electa est moderatrix generalis, quod officium tenebat inde ab anno 1850 usque ad finem vitae suae terrestris. Obiit die 8 maii anno 1894 in vico Simpelveld in Nederlandia.

De Communi virginum vel de Communi pro religiosis vel de Communi sanctarum mulierum (Pro iis qui opera misericordiae exercuerunt).

E meditatione quadam beatæ Claræ a Paupere Infante Iesu anno 1846 habita

Parvuli pauperes sunt carissimi amici Iesu.

Consideremus felicitatem eorum, qui illo tempore vixerunt, quo Dominus noster visibiliter in terra moratus est; quibus gratia data est eum in domum suam suscipere, ei convivium praeparare, ei servitia offerre. O, quis non felicem se praedicet, Dominum nostrum Iesum suscipere! Illum Deum omnipotentem! Quis non optet hoc, quis hoc non desideret!

Hodie dicit nobis Dominus, ut nosmetipsi possimus suscipere eum: qui susceperit unum parvulum talem in nomine meo, me suscipit (Mt 18,5). Possumus ergo suscipere Dominum; occasiones suscipiendi parvulum pauperem non desunt; solummodo necesse est ut hoc faciamus in nomine Iesu. Pauperes, speciatim parvuli pauperes, sunt carissimi amici Iesu. Diligit eos ita, ut omnia quae eis fiunt, consideret tamquam facta ei (cf. Mt 25,40); certe ergo etiam nos diligamus et honoremus illos. Forma exterior cuiusdam mendici vel parvuli pauperis saepe abhorret hominem sensibus subiectum; sub pannis exiguis misera, debilia, saepe membra vulnerosa; tamen videamus diligenter, an forte sub his panniculis, sub hac miseria Dominum Iesum inveniamus. Non pauci sancti eum hoc modo invenerunt; quoniam sancti aspectu interiore acute vident. Non paucis sanctis apparuit Dominus in forma mendici miseri vel in forma parvuli pauperis; beati illi, quoniam mendicum vel parvulum non reiecerunt. Qualem thesaurum susceperunt!

℟. Esurivi, et dedistis mihi manducare; sitivi, et dedistis mihi bibere; hospes eram, et collegistis me: * Amen dico vobis: Quamdiu fecistis uni ex his fratribus meis minimis, mihi fecistis (T. P. alleluia).

℣. Feneratur Domino, qui miseretur pauperis. * Amen dico vobis: Quamdiu fecistis uni ex his fratribus meis minimis, mihi fecistis (T. P. alleluia).

Misericors Deus, cuius Filio pro nobis puero nato beata Clara virgo in fovendis infantibus praesertim pauperibus ac derelictis servire studuit, praesta, quaesumus, ipsa intercedente, ut Ecclesiae tuae numquam deficiant, qui ad pueritiam tuendam viasque salutis docendam nitantur. Per Dominum.