Sancti Alberti Chmielowski, religiosi
Frater Albertus, in sæculo Adamus Chmielowski, in loco vulgo nuncupato Igomia, intra fines diœceseos Cracoviensis, in Polonia, die 20 augusti 1845 ortus est.
Anno 1863 iis se coniunxit qui, Poloniæ libertatis adipiscendæ cupidi, consurrexerunt. Vulnere in bello confectus, in captivitatem ductus, cruris amputationem perpassus est.
Anno 1884 Cracoviæ sedem sibi constituit, ubi pauperum necessitates in publicis dormitoriis expertus, pauperem esse cum pauperibus sibi constituit, ut Evangelii caritatis fieret testis.
Voltis Tertii Ordinis S. Francisci anno 1888 nuncupatis humilique induto habitu, coadiutores sibi adiunxit et Congregationes Fratrum Sororumque Tertii Ordinis S. Francisci Pauperibus Servientium fundavit.
Anno 1916, die Dominicæ Nativitatis, Cracoviæ pie obiit.
«Veníte, benedícti Patris mei, dicit Dóminus: infírmus eram, et visitástis me. Amen dico vobis, quámdiu fecístis uni ex his frátribus meis mínimis, mihi fecístis».
Deus, dives in misericórdia qui sancto Alberto inspirasti offensum Filii tui vultum in pauperibus et indigentibus conspicere, concede benignus, ut eius moti exemplo, per opera misericordiæ egenorum omnium fratres inveniamur. Per Dóminum.
Suscipe, Dómine, hæc munera, quæ in memoria sancti Alberti deferimus, ut paschale Christi sacrificium, quo suam erga nos dilectionem usque in finem monstravit, nos quoque in eadem caritate confirmet. Per Christum.
«In hoc cognoscent omnes quia discipuli mei estis, si dilectionem habueritis ad invicem», dicit Dóminus.
Concede, quæsumus, misericors Pater, ut sicut sanctus Albertus Filium tuum Magnum et Dóminum imitando, fratrum servus factus est, ita et nos, Christi Corpore et Sanguine refecti, inter fratres caritatis cibum generose partiamur. Per Christum.
Textus latinus Missæ Sancti Alberti Chmielowski, religiosi, probatus seu confirmatus die 23 septembris 1989, Prot. CD 428/89. Cf. Notitiae 1990 (282), p. 24.